Ammam, 23 prill 2025 – Qeveria jordaneze ka shpallur të paligjshme organizatën Vëllazëria Myslimane, grupin më të zëshëm opozitar në vend, dhe ka konfiskuar të gjitha asetet dhe zyrat e saj, pasi disa anëtarë të grupit u zbuluan se ishin të lidhur me një plan sabotimi. Këtë e bëri të ditur Ministri i Brendshëm, Mazen Fraya.
Nuk ka pasur ende asnjë reagim zyrtar nga vetë lëvizja, e cila ka vepruar ligjërisht në Jordani për dekada me radhë dhe gëzon mbështetje të gjerë në qendrat urbane, si dhe ka dhjetëra zyra në të gjithë vendin.
Javën e kaluar, Jordania njoftoi arrestimin e 16 anëtarëve të Vëllazërisë Myslimane, të cilët sipas autoriteteve ishin trajnuar dhe financuar në Liban dhe po planifikonin sulme me raketa dhe dronë ndaj objektivave brenda mbretërisë. Po ashtu, Jordania fajësoi një celulë të kësaj organizate për një tjetër komplot të dështuar në vitin 2024.
Fraya deklaroi se të gjitha aktivitetet e grupit janë ndaluar dhe se çdo individ që promovon ideologjinë e tij do të përballet me ligjin. Ndalesa përfshin ndalimin e botimeve të çdo lloj materiali të lidhur me grupin, si dhe mbylljen dhe konfiskimin e zyrave e pasurive të tyre.
Vëllazëria Myslimane është një ndër lëvizjet islamike më të vjetra dhe më me ndikim në botën arabe. Ajo e ka mohuar lidhjen me komplotin e pretenduar, megjithëse ka pranuar që disa anëtarë mund të kenë vepruar në mënyrë të pavarur në kontrabandimin e armëve për palestinezët në Bregun Perëndimor të pushtuar.
Kundërshtarët e grupit, që është i ndaluar në shumicën e vendeve arabe, e konsiderojnë atë një organizatë të rrezikshme terroriste që duhet shtypur. Ndërkohë, vetë lëvizja deklaron se ka hequr dorë nga dhuna prej dekadash dhe se ndjek një vizion islamik me mjete paqësore.
Krahu politik i Vëllazërisë në Jordani, Fronti i Veprimit Islamik, u bë grupimi më i madh në parlament pas zgjedhjeve të shtatorit të kaluar, megjithëse shumica e vendeve janë ende të kontrolluara nga përkrahësit e qeverisë.
Ministri Fraya deklaroi gjithashtu se anëtarët e Vëllazërisë kishin planifikuar sulme ndaj objektivave të sigurisë dhe vendeve të ndjeshme, me synimin për të destabilizuar vendin, por nuk dha detaje mbi këto objektiva.
Forcat e sigurisë bënë të ditur javën e kaluar se kishin zbuluar një objekt për prodhimin e raketave dhe një fabrikë dronësh, ku po zhvilloheshin raketa me rreze të shkurtër veprimi, dhe se të paktën një raketë ishte gati për lëshim.
Burimi: Al Arabiya dhe Reuters
