Mbreti Abdullah II i Jordanisë diskuton çështje sigurie me Princin e Kurorës Saudite në Xheda
Takimi vjen pas ndalimit të Vëllazërisë Myslimane në Jordani
Mbreti i Jordanisë, Abdullah II, u takua të mërkurën në Xheda me Princin e Kurorës Saudite, Mohammed bin Salman, për të diskutuar çështje sigurie në Lindjen e Mesme. Takimi ndodhi menjëherë pasi Jordania shpalli ndalimin e Vëllazërisë Myslimane për lidhje të dyshuara me një komplot shpërthyes.
Agjencia zyrtare e lajmeve saudite, SPA, raportoi se të dy liderët “shkëmbëyen pikëpamje mbi zhvillimet kyçe në botën arabe dhe islame, dhe trajtuan çështjet rajonale, veçanërisht ato që lidhen me sigurinë dhe stabilitetin e Lindjes së Mesme”.
Autoritetet jordaneze njoftuan të mërkurën ndalimin e aktiviteteve të Vëllazërisë Myslimane, pasi dhjetëra anëtarë të saj u implikuan në një komplot të dyshuar të armatosur kundër shtetit. Grupi është gjithashtu i ndaluar edhe në Arabinë Saudite.
Ministri i Brendshëm i Jordanisë, Mazen Al Faraya, deklaroi në një transmetim televiziv se anëtarësia në këtë organizatë është tashmë e ndaluar dhe të gjitha zyrat e saj në mbretëri janë mbyllur. Mediat jordaneze janë ndaluar gjithashtu të mbështesin grupin.
Një gjykatë jordaneze akuzoi javën e kaluar 12 persona të lidhur me Vëllazërinë Myslimane për krime të lidhura me terrorizëm, për një plan të dyshuar për prodhim armësh dhe dronësh, me qëllim destabilizimin e vendit. Al Faraya deklaroi se autoritetet kishin zbuluar armë dhe eksplozivë në zona të banuara, objekte sekrete për prodhimin e raketave dhe “operacione për trajnim dhe rekrutime” të lidhura me grupin.
Ky është rasti i parë në dekada që një grup i brendshëm akuzohet për një komplot kaq serioz dhe të rrezikshëm.
Takimi mes Mbretit Abdullah dhe Princit Mohammed gjithashtu trajtoi zhvillimet në rajon, në veçanti situatën në Gaza dhe Bregun Perëndimor, sipas agjencisë zyrtare jordaneze Petra.
Takimi ndodh në një kohë kur të dy vendet – aleate të Uashingtonit – po përballen me tarifat e vendosura nga Presidenti amerikan Donald Trump. Jordania po përballet me një taksë doganore prej 20% mbi eksportet e saj në SHBA, pavarësisht marrëveshjes së tregtisë së lirë që është në fuqi që nga viti 2010, ndërsa Arabia Saudite po përballet me një tarifë bazë prej 10%.
Trump gjithashtu ka bërë shkurtime në ndihmën amerikane, çka rrezikon të ketë pasoja të gjera për Jordaninë.
The National
