Partia në pushtet “Vëllezërit e Italisë” (Fratelli d’Italia) ka propozuar një ligj që ndalon mbajtjen e burkës dhe nikabit në vendet publike, si shkolla, zyra shtetërore dhe dyqane. Shkelësit mund të gjobiten nga 300 deri në 3,000 euro.
Deputeti Andrea Delmastro, një nga hartuesit e projektligjit, theksoi se masa synon të ruajë balancën mes lirisë fetare dhe parimeve kushtetuese.
“Liria fetare është e shenjtë, por duhet ushtruar hapur, në respekt të plotë të Kushtetutës dhe parimeve të shtetit italian,” – shkroi ai në rrjete sociale.
Projektligji përcakton qartë se cilat veshje ndalohen:
- Burka mbulon të gjithë trupin dhe fytyrën me rrjetë mbi sy,
- Niqabi lë të dukshme vetëm sytë, ndërsa mbulon pjesën tjetër të fytyrës.
Të dyja do të ndalohen në shumicën e hapësirave publike.
Sara Kelany, përgjegjëse për çështjet e emigracionit në partinë “Vëllezërit e Italisë”, tha se ndalimi është pjesë e një pakete më të gjerë ligjore kundër asaj që qeveria e Giorgia Melonit e quan “separatizëm islamik”.
Paketa përfshin gjithashtu:
- rregulla për financimin e xhamive,
- ndalim të martesave të detyruara,
- detyrim për grupet fetare pa njohje shtetërore që të raportojnë burimet e fondeve të huaja.
Ligje të ngjashme ekzistojnë tashmë në Francë, Belgjikë dhe Danimarkë, ku mbulimi i fytyrës në publik është i ndaluar.
Qeveria italiane e qendrës së djathtë e sheh këtë si pjesë të një politike integruese kulturore, ndërsa komunitetet myslimane pritet të reagojnë pasi masa mund të ngjallë sfida ligjore dhe protesta publike.
Projektligji do të kalojë në fazat e zakonshme parlamentare për shqyrtim dhe ndryshime, por meqë “Vëllezërit e Italisë” kanë shumicën, miratimi i tij është i mundshëm.
Kjo nismë pason debatet e vazhdueshme në Evropë mbi balancën midis lirisë fetare dhe vlerave laike në hapësirat publike. /bota-islame.com
